Dili- Ministério Agrikultura Pecuária Pesca no Floresta (MAPPF) liu husi Dirasaun Nasionál Pesquisa e Estatistica (DNPE) servisu hamutuk ho Peritus husi Universidade Udayana Bali -Indonesia halo abertura ba atividade Evaluasaun utilizasaun Solo no mapamentu ba area Potensial hodi dezenvolve Komoditi Agrikultura iha Timor Leste, seremónia ne’e ofisialmente loke husi Diretór gerál Servisu dos Cooporativos hanesan mós Reprezenta Ministro, Rofino Soares Gusmão iha Tersa (23/07/24) Salaun MAPPF Comoro.
Bazeia ba planu IX Governu Constitucional liu husi programa MAPPF tau prioridade rai nu’udar pilar importante ne’eduni objetivu husi diagnostiku rai sei sai hanesan baze dadus kredivel ba governu Timor -Leste liu husi MAPPF hodi halo planu dezenvolvimentu iha setór Agrikultura hodi hasa’e produsaun agrikola ho sustentavel, liu-liu oinsa istimula kresimentu produsaun tuir área ida-idak nia potensialidade ba komuditi prinsipál sira hodi bele atende nesesidade populasaun.
Iha entrevista Reprezenta Ministro Rofino Soares Gusmão esplika, enkontru ne’e atu halo konsolida ba MAPPF liu-liu iha Dirasaun (DNPE) nian iha area utilizasaun rai, MAPPF asina ona akordu ho Universidade Udayana Bali, iha fulan rua ba kotuk, neduni ohin realiza ona komprimisiu husi akordu ne’e, atu bele realiza peskiza konaba utilizasaun solo.
Nia hatutan, Peskiza ne’e importante tebes tanba MAPPF foin halo peskiza kona-ba rai liu-liu ba iha munisipio sira ne’ebé mak utiliza iha area produsaun agrikultura nian, durante ne’e Ministerio mós iha hanoin katak kualker aihoris ita kuda bele moris hotu, maibe atu identifika lolos aihoris ida ne’ebe moris iha rai ho kondisaun ho nutriente ne’e seidauk iha, entaun ida ne’e mak peritus sira mai husi Bali (Indonésia) servisu hamutuk ho Udayana Bali atu bele fo asistensia ba iha Ministério hodi bele realiza peskiza ida ne’e tuir planu ne’ebe maka Ministério iha.
Iha fatin hanesan Chefe Departamentu Solos e Nutrição Plantas Celestino Luis Moreira hateten, momentu ida ne’e hanesan momentu importante tebes ba MAPPF, tanba iha programa importante ida oinsa halo identifikasaun halo diagnostiku no análiza rai bokur iha Munisipio hotu hotu. Tanba ita hatene katak rai hanesan baze fundamental ida, esforsu hotu hotu ita halo investimentu iha infraestrutura Irigasaun no fini barak ita destribui, maibe produsaun rai laran sei nafatin de’it, entaun rai hanesan baze fundamental ida.
“Iha IX Governo, orienta ba agrikultura sira katak, wainhira atu kuda ai horis ka halo plantasaun presiza halo análiza diagnostiku ba rai, tanba ne’e ohin ita hahu abertura no hahu aban ita servisu iha terenu. Area sira ne’ebe ita kobre tuir lolos iha Timor laran tomak, maibe nia kapasidade ba fnanseira orsamentu ne’ebe koloka mai la sufisiente entaun iha faze primeiro ita sei konsentra lai iha munisipio maka hanesan Baucau, Viqueque, Manufahi, Ainaro, Covalima, Bobonaro ho Ermera. Dalabarak ema sempre dehan rai ne’e bokur maibe ita la liu husi analiza diagnostiku ida, entaun ita la hatene katak nutrisaun saida makai ha ne’eba, tanba aihoris presiza nutrisaun.” Tenik Celestino
Nia informa, Ekipa mos sei foti amostra iha terenu, depois lori ba laboratorium, ita sei halo análiza laboratorium, tanba ita iha Timor ita nia laboratorium ba rai ne’e minimu tebes, Ministério iha laboratorium maibe ita foin maka análiza iha parametru balun de’it, ita labele halo hotu iha ne’e, tanba ne’e ita sei lori ba Indonésia hodi análiza. Ekipa DMEA