Bobonaro, Ministru Agrikultura Pekuária Peska no Floresta (MAPPF) Marcos “MAMETA” da Cruz akompaña husi prezidente Autoridade Municipal (PAM) Bobonaro Alexandre Pires ho agrikultór husi Munisípiu Ermera no Likisa inklui Maliana koko makina koa hare modernu ne’ebé mak hetan apoiu husi programa Hasa’e produtividade Agrikultura Sustentavel (HAPAS) ba Agrikultór sira. Atividade ne’e realiza iha loron 10/05/25 iha Aldeia Diruaben Suku Ritabou Posto Administrativo Maliana.
Depoisde remata koko makina modern hodi koa hare, Ministru MAPPF esplika, iha Munisípiu Bobonaro iha grupu 26 hetan apoiu makina koa hare, kuda hare no tratór kiik (hand tractor) husi SAPIP liu husi Ministériu Agrikultura ne’eduni ohin hamutuk ho gruou sira koko makina hirak ne’e hanesan mós pratíka uza makina koa hare ne’e hanesan mós parte husi treinamentu ba agrikultór sira ne’ebe mak simu ona makina hirak ne’e. maibé atu uza makina tenki hetan treinamentu husi kompañia atu bele sai operador ba makina refere. “Ha’u mós mai atu observa produsaun iha Munisipiu Bobonaro, tanba ita hatene katak Maliana fatin potensial ba hare, tanba ne’e Ministériu kria kondisaun balu iha ne’e hanesan infraestrutura bazíku husi parte Maliana 1, no mós atu koko makina hirak ne’e diak duni ba povu ga lae, ajuda duni ga lae? Ita hatene katak makina hirak ne’e kuantidade, seidauk kobre ba agrikultór sira hotu, maibé buat ne’ebé mak ita hetan ita buka atu introdus uluk ema sira. Governu nafatin buka meius oínsa atu fasilita povu, liu-liu agrikultór sira.” Tenik Ministru
Ministru akresenta, makina sira ne’ebé mak distribui ba agrikultór sira iha Munisípiu hitu ne’e sosa husi orsamentu Banku Mundial ne’ebe liu husi programa SAPIP, maibe MAPPF mak jere no halo jestaun. Ba munisípiu seluk ne’ebé mak la tama iha programa SAPIP ne’e mós iha orsamentu Jerál Estadu tinan ida ne’e ninian aloka osan ba sosa ekipamentu modernu no dadaun ne’e kompañia balun manan ona hein atu sosa makina hodi fo mós ba agrikultór balun iha munisípiú sira seluk. Ne’e hanesan meius ida buka atu moderniza setór agrikultura liu-liu iha produsaun hare ninian, iha tinan hirak liu ba Ministériu apoiu makina fila rai de’it, maibe agora ajuda tan ona iha parte kuda hare no koa ninian.
Ministru mós husu ba komunidade sira ne’ebé mak hela iha parte Kanu Maliana 1 atu labele soe foer arbiru de’it, liu-liu hanesan plastiku ,aqua mamuk sira atu labele soe ba kanu laran hodi estraga fali.
Iha fatin hanesan, PAM Bobonaro Alexandre Pires salienta katak ho apoiu makina koa hare modernu ne’e ho hanoin ona katak hahan iha Munisípiu Maliana Autosufisiente, tanba ne’e lori povu Bobonaro nian naran hodi agradese ba apoiu tomak husi Ministerio Agricultura pecuária pesca no Floresta liu husi Banku Mundial sosa ona makina modernu hahu husi kuda to’o koa.
Nia subliña, Makina koa hare modernu ne’e la presiza tempu naruk, ho tempu badak bele halo ona servisu, ho kalkulasaun hirak ne’e katak loron ida bele koa hare éktare ida, hirak ne’e hotu apoiu ona agrikultór sira atu labele servisu todan tan.
Nia informa, durante ne’e agikultór sira senti todan mak iha tempu koa hare tanba atu koa hare agrikultór sira koa ho manual gasta tempu naruk tebes depoisde koa tanba area luan entaun hare presija sei rai hela ne’e afeira hare balun bele dodok entaun afeita mós ba rezultadu ikus produsaun menus. Maibé ho hanoin diak husi polítiku nunu Govern Konstitusionál nian liu-husi MAPPF atu reduz ona dezafiu ne’ebé agrikultór sira hasoru hodi hasa’e ona volume produsaun, atu nune, Bobonaro bele hakat ona ba iha Auto Sufisiente Aihan.
Nune’e mós Agrikultór Antonio Mau senti kontente ba apoiu makina hirak ne’e, tanba durante ne’e sira halo natar tinan tinan lakon osan barak hodi selu ema, maibe tinan ne’e bele uza ona makina koa hare nune’e bele hamenus ona osan gastu ninian. Ekipa DMEA.