Ermera- 12/05/25 Ministru Agrikultura Pekuária Peska no Floresta (MAPPF) Marcos ’’MAMETA’’ da Cruz akompaña husi Sekretário Estadu Floresta (SEF) Fernandino Vieira Da Costa nomos Prezidente Autoridade Municipal Ermera José Martinho dos Santos Soares ofisialmente entrega ekipamentu Agrikola modern unidade 4 ba grupu agrikultór 2 iha Suku Samara Postu Administrativu Hatulia A.
Iha entrevista Ministru MAPPF esplika, makina hirak ne’e modernu iha tipu 3 hanesan makina fila rai unidade ida, makina kuda hare unidade rua nomós makina koa hare unidade ida. Makina hirak ne’e atu bele apoiu no ajuda povu servisu ho Kama’an liu tanba bele reduz tempu servisu no kustu bainhira sira fila rai no koa hare.
’’Ha’u mós ba haree iha terenu, sira nia rai kuaze 300 ektare, maibé iha área balu sira kuda hare , ho apoiu husi PAM nia programa mak hadia ona irrigasaun ida iha iha Limea kra’ik, maibé sira mós presiza atu halo irrigasaun diak hodi kobre ba Suku rua hanesan área Suku Samara no Suku Leimia ninia tanba ha’u mós haree diretamente ona iha terenu, área barak kuaze 100 ektare mak sei abandona, balu sira kuda duni hare maibe sei uza Sistema tradisionál (kari), tanba ne’e ha’u orienta ona ba Diretór irrigasaun atu mobiliza eskavadór mai normaliza kanu irrigasaun no ekopa husi Diresaun Nasionál irrigasaun mai mós sei halo estudu depois tinan balu mai ita bele halo kontrusaun diak liu tan iha irrigasaun iha Suku Samara no Leimia.tenik Ministro
Ministru hatutan, estensionista sira Munisípiu Ermera ne’e bele hanorin agrikultór sira atu kuda hare tuir metodu ne’ebé diak ka babain bolu Pratika Agrikultura Diak (PAD), metodu hirak ne’e ita implementa ho makina hirak ne’ebé mak Ministériu liu husi SAPIP apoiu ba grupu sira tanba ne’e agrikultor sira servisu bele hamutuk hodi hasa’e produsaun sira iha área Agrikultura, pekuária peska no Floresta.
Iha fatin hanesan, xefe Suku Samara Marcelo Caitano Menezes, hato’o Agradese tebes ba MAPPF bele apoiu ekipamentus ba suku ida ne’e atu hafasil servisu iha natar. Babain komunidade sira halo natar kari de’it, maibé ba oin ho makina ne’ebé mak iha bele halo mudansa ona iha área agrikultura. No Agradese mós irrigasaun ne’ebé mak Governu apoiu ami sente kontente tebes tanba bele hafasil ami halo natar.
Antes atividade entrega ekipamentu agrikola modernu ba grupu sira Ministru akompaña husi SEF, PAM, APA Hatulia, Diretór nasionál Floresta no autoridade lokál sira vizita uluk natar no kanál irrigasaun iha Leimea kraik. Ekipa DMEA