Ainaro, 24 Juñu 2025, Ministru Agrikultura, Pekuária, Peska no Floresta, Marcos “MAMETA” da Cruz, akompaña husi Prezidente Autoridade Municipal Ainaru, Manuela Carmo Bucar Corte-Real hamutuk ho Agrikutór sira lansa atividade kolleta hare uza mákina moderna katak agrikultór sira hahú neneik hodi moderniza setór agrikultura uza makina modernu sira iha Fatunaru suku cassa, postu administrativu Ainaro Vila munisípiu Ainaro.
Ministru MAPPF hatete, hare ne'ebé kolleta ne’e iha fulan tolu kotuk Ministru rasik hamutuk ho agrikultór sira kuda uza mákina modernu nian no konsege kolleta mós uza mákina modernu ko'a nian ne’ebé mak babain bolu ho makina Combain harvester katak makina koa, hamo’os no ense kedas ba karon. "Hare ne'ebé ohin ita kolleta hamutuk ektare 100. Antes kolleta uza mákina moderna ita koko ko'a hare tradisionál uza sabit ka tudik ne’e presija tempu barak iha natr laran hodi koa maibé hafoin uza fali mákina moderna ida ne'e atu hatudu katak Governu kontinua buka meuis hodi halo modernizasaun iha setór agrikultura liuliu ba dezenvolvimentu hasa'e produsaun hare nian",Tenki Ministru iha Fatunaru hafoin lansa kolleta hare uza mákina moderna ko'a hare nian.
Ministru hatutan, Ministériu hahú buka atu moderniza atividade iha área agrikultura nian hodi hasa'e produsaun hare ne’eduni Ministériu hahú fahe makina hanesan hand tractor, mákina kuda hare no mákina ko'a hare, ida ne'e atu fasilita agrikultór sira no atu hakmaan sira-nia serbisu l ne'ebé durante sira halo ho manual ka tradisionál, mákina moderna ne'ebé Governu apoiu ba munisípiu Ainaro rasik hamutuk 58 ida ne'e kompostu husi mákina fila rai 27 kuda 21 no ko'a 10.
Ministru subliña, Hafoin fahe mákina moderna ba agrikutór sira iha munisípiu hotu inklui Ainaro haree katak komunidade barak mak entuziasmu tebes tanba natar barak mak antes ne'e abandona maibé agora hahú ativa fali ona tanba mákina sira ne'e fasilita tebes agrikultór sira maibé Ministériu rekoñese katak mákina sira ne'ebé oferese ba agrikultór sira iha munisípiu sira inklui Ainaro seidauk sufisiente maibé ida ne'e hatudu katak Governu hahú moderniza ona no bele motiva komunidade bele filafali ba natar tanba Governu buka kontinua atu apoiu hodi hasa'e produsaun hare iha rai-laran.
Ministru mós husu agrikultór sira nafatin kuidadu mákina sira ne'e bainhira uza hotu rai iha mahon nune'e bele fasilita serbisu agrikultór nian ba tempu naruk. Tanba hare ne’ebé mak kolleta ona ne’e husi Parte governu sei halo koordena ona Sentru Lojístiku Nasionál (CLN, sigla portugés), hodi sosa hare ne'ebé ohin kolleta ne'e. " Ho ida ne'e ita husu agrikultór sira kontinua kuda filafali hare depoizde kolleta".
Iha fatin hanesan, Prezidente Autoridade Municipal Ainaro, Manuela Carmo Bucar Corte-Real, hatete agradese tebes ba prezensa Ministru Agrikultura tanba hare ne'ebé ohin kolleta antes ne'e kuda mós ministru rasik mai kuda uza mákina moderna no ohin loron atu kolleta konvida nafatin Ministru hodi kuda kolleta uza mákina moderna. "Ha'u hanoin prezensa Ministru Agrikultura nian iha Kasa ida ne'e motivasaun boot ida ba ita-nia agrikultór sira atu badinas liutan serbisu iha área agrikultura nian hodi hasa'e produsaun hare iha rai-laran".
Entretantu Xefe grupu Buitiris, Alfredo Pereira, hateten nia parte agradese tebes ba Governu tanba bele fasilita ona sira ho mákina moderna ne'ebé bele halo produsaun hare. Tanba hothotu hatene depoiz de ukun an ne’e uza uza karau mak halai, maibé agora mákina moderna iha ona falisita tebes atividade agrikultór nian., " Mákina moderna sira ne'e bele hakmaan ami-nia serbisu iha terrenu hodi hasa'e produsaun hare nian nune'e bele kontribui ona ba merkadu nasionál, tanba antes ne'e seidauk iha mákina moderna de'it ita serbisu ona, sa tán agora iha ona mákina ida ne'e sei fasilita ami-nia serbisu", dehan.
Xefe grupu ne’e dehan mákina moderna sira ne'ebé Governu apoiu grupu agrikultór ne'e uza ka utiliza iha regra mak tantu grupu agrikultór ka individu ne'ebé mak uza mákina kolleta hare kada kolleta tenke hatama $10 ida ne'e objetivu atu halo manutensaun ba mákina karik loron ruma avaria.
Iha atividade lansamentu kolleta hare ferere marka prezensa mós husi Komandante Polísia Nasionál Timor-Leste Ainaro, reprezentante Sustainable Agriculture Productivity Improvement Project (SAPIP) iha Timor-Leste, autoridade postu administrativu sira, xefe suku Kasa, inklui agrikutór sira. Ekipa DMEA