Ainaro, 24 Juñu 2025, Ministru Agrikultura Pekuária Peska no Floresta simbolika vasina animál karau 25 kabesa no tau brinkus ba karau hodi prevene atu labele moras no tara brinkus ba karau nia tilun ne'e hanesan identifikasaun ida ba karau sira nune’e fasíl bele kontrola. Iha aldea Lailima, suku Cassa, postu administrativu Ainaro Vila, munisípiu Ainaro.
Ministru Agrikultura, Pekuária, Peska no Floresta, Marcos “MAMETA”da Cruz, hatete, karau 25 ne'ebé grupu Garana haki'ak ne'e hetan apoiu husi Ministeriu Dezenvolvimentu Rurál no Abitasaun Komunitária (MDRHC), durante fulan ona tanba ne’e animál sira mós presiza kuidadu atu labele moras entaun ohin fó vasina tiha no tara brinkus ba sira-nia tilun, ida ne'e hanesan identifikasaun ida ba karau sira nune’e fasil atu kontrola. "Ita-nia tékniku sira mós mai apoiu grupu ne'e oinsá atu kuda ai-han ba karau sira ne'e hanesan ai-lamtoro, ai-kafé, ita mós sujere kuda mós ai-turi, no seluk tan ne'ebé durante ne'e ita dezenvolve ona iha fatin seluk," Marcos da Cruz informa hafoin fó vasina ba karau.
Iha biban ne'e Ministru MAPPF husu ba públiku ne'ebé iha karau tenke tau iha luhan, kesi fó vasina tanba iha territóriu ekipa Pekuária husi Ministeriu nian iha hotu nune’e atu bele fasilita fó vasina ba animál sira hanesan, karau, fahi, manu no asu.
Iha fatin hanesan, Xefe grupu Garana, Satorlino da Luz, hatete grupu ida ne'e kompostu ema na'in 25 hetan apoiu fundus husi Ministeriu Dezenvolvimentu Rurál no Abitasaun Komunitária (MDRHC, sigla portugés) osan rihun $15 hodi halop kontrusaun luhan no sosa karau hodi hakiak.
Xefe ne’e hatutan. grupu ne’e haki'ak karau ho ho objetivu ida katak atu hakiak no habokur karau inan no aman. haki'ak inan katak atu iha oan no habokur aman katak boot faan hodi hetan rendimentu.
Nune'e karau ne'ebé daudaun sira haki'ak hamutuk 25 kabesa kompostu inan tolu no restu aman hotu. " Osan ami hetan husi Ministeriu Dezenvolvimentu Rurál hamutuk rihun $15, ida ne'e kompostu konstrusaun ba karau fatin inklui sosa karau, ne'ebé kada karau grupu ne’e sosa ho folin $350”.
Nia subliña sente kontente tebes tanba Governu bele apoiu sira-nia grupu haki'ak karau no ohin Ministru Agrikultura, Pekuária, Peska no Floresta, Marcos da Cruz hamutuk ho grupu Veterenária bele hakat ba sira-nia fatin hodi fó vasina ba karau sira ne'e inklui tara brinkus ba karau nia tilun. Ekipa DMEA